O casino virtual de "Eurozone" |
Satírica,
divertida e interesante pero ocasionalmente falta de forza. Irregular e
con altibaixos. Este é o pouso que deixa "Eurozone", de Grupo
Chévere, segunda proposta do FIOT e primeira dunha compañía galega nesta
edición. A idea de partida é realmente fantástica. Os dirixentes económicos e
políticos da zona euro son retratados como os matóns de pacotilla da aclamada
película de Quentin Tarantino "Reservoir Dogs" (1992). O único mérito
destes pseudo personaxes é o de contar con poder grazas a un gatillo fácil e á
súa ausencia de escrúpulos. Certamente, é facil imaxinar a Sarkozy, Merkel,
Cameron, Draghi ou Lagarde xogando á ruleta económica e "atracando"
aos infelices cidadáns europeos. De cotío son o motivo das dores de cabeza de
medio continente. Aínda que non excesivamente orixinal, a idea resulta
brillante pola súa forza dramática. Lástima que o desenvolvemento non teña a
mesma forza que este fío condutor, alomenos non durante toda a peza. Grupo
Chévere distribúe "Eurozone" en tres planos distintos: o primeiro, é
metateatral, o duns actores que sobre a marcha van tentando construír un
espectáculo; o segundo, o de "Reservoir Dogs", o señor Branco, Azul,
Marrón, etc., os pistoleiros desapiadados; e o terceiro o da Unión Europea, con
países personificados nos seus dirixentes. E un dos erros da peza reside
precisamente na presenza destas tres lecturas. Boa parte do tempo da función
pérdese en explicarlle ao espectador en que consiste a película de Tarantino,
en que consiste a zona euro, en que consiste o que van facendo polo escenario.
En aclarar que en realidade Merkel non é Merkel senón Patricia de Lorenzo,
facendo de Merkel, que fai de Alemaña, que fai de señor Marrón que simboliza a
zona euro. Un desperdicio de tempo, xa que o espectador está desexando entrar
de cheo no delirante mundo destes matóns. Outra das eivas da peza é a inclusión
dalgúns gags fallidos. Así, aínda que resulta moi interesante que
"Eurozone" sexa a primeira proposta teatral que inclúe unha dobraxe
fílmica en directo, esta escusa non é o suficientemente forte, na humilde
opinión de quen subscribe, como para incluír unha metraxe que non resulta
efectiva. E non o resulta porque a idea que quere transmitir, unha Europa
violada por Zeus transformado en touro e plasmada nos novos billetes de 5 €
sería unha imaxe poderosa, mais que queda diluída. Outro dos cadros, a tortura de Rodrigo Rato, tamén resulta lento e innecesario. No saldo positivo, a
marabillosa imitación de Angela Merkel por parte de Patricia de Lorenzo, a
lenta agonía dunha España abafada por esa prima de risco que ninguén sabe o que
é, ou as continuas labazadas que reparte a obra para desvelar un sistema
económico absurdo, oligárquico, que tan só conta cun lixeiro verniz demócrata e
baseado na intimidación, no poder e na xermanocracia. Todo descrito coa axuda
do sarcasmo constante e as gargalladas, que tamén as hai e o público foi quen
de encontralas a miúdo. Outra das mellores escenas é a dun casino -alias
Eurovegas- no que o premio final é disparar a un dirixente europeo da man da
"Troik Pot". Aínda que tamén hai que subliñar que algún dos mellores
chistes os realiza a persoa do público que axudou a construír o cadro. En
definitiva, "Eurozone" é un exercicio satírico e humorístico, por
momentos brillante, pero por momentos necesitado dunha aproximación mais
directa, máis sinxela e incluso máis mordaz, xa que, a pesar de que a mensaxe
queda clara, un intúe que o espectáculo podía dar un paso máis e pasar de ser
un cúmulo de boas ideas executadas con oficio a ser unha excelente obra de
teatro.
Comentarios
Publicar un comentario